Bakıdakı “Volkswagen”, “Audi”, “Seat”, “Porsche”nin icra başçısına aid olduğu təsdiqləndi

Sabunçu rayonu İcra Hakimiyəti modern.az saytında yer alan “Bakıda icra başçılarının sahib olduqları restoranlar, ticarət obyektləri, tikinti şirkətləri – SABUNÇU” başlıqlı məqaləsinə cavab verib

Saytın suallarını icra başçısına çatdırmaqdan imtina edən köməkçi Müslüm Mahmudov yalnıız yazı dərc olunduqdan sonra açıqlama vermək qərarına gəlib. Eyni zamanda yazılanların reallığı əks etdirdiyini bildirib. Biz də obyektivlik naminə həmin açıqlamanı tədim edirik:

“Doğrudur Adil Vəliyev icra başçısı təyin olunmazdan əvvəl həqiqətən də “Sarı gəlin” şadlıq sarayı olub. 3 il əvvəl icra başçısı təyin olunan zaman Adil müəllim şadlıq sarayını satıb. Amma məqalədə qeyd etdiyiniz kimi o, Şakir Alıyevlə ortaq olmayıb. Şakir Alıyev “Sarı gəlin “şadlıq sarayının direktoru vəzifəsini icra edib. Hazırda isə rəsmi olaraq Adil Vəliyevə məxsus şadlıq sarayı yoxdur”.

Müslüm Mahmudov avtomobillərlə bağlı məqamın da reallığı əks etdirdiyini vurğulayıb: “Bəli, Adil müəllim “Volkswagen”, “Audi”, “Seat”, “Porsche” avtomobil markalarının ölkəmizdəki rəsmi importyorudur. Sadəcə vəzifədə olduğundan bu işlərlə oğlu Ənvər Vəliyev məşğul olur. İcra başçısı şəxsən bizneslə məşğul deyil”.

Adil Vəliyevin Sabunçu ərazisində ticarət obyektləri, çoxmərtəbəli binalarının olduğu barədə məsələyə isə aydınlıq gətirilməyib.